貓貓旁邊仲有芒亨豬一隻畀來賓抱住影，非常體貼。 

漫遊毒物

直擊芒亨日本熱　艾露貓落場親民！

呢排日本大熱劇《半澤直樹》收視創新高，遊戲界巨星《 Monster Hunter 4》開賣兩日，一樣狂賣 170多萬隻，帶動埋 3DS主機單週狂賣 27萬部，銷情暴升 250%，勁過 iPhone 5c都未定。得個講字你未必信，記者身在日本，親眼在澀谷站見到史上最巨型 game廣告、秋葉原宅系獵人滿街坐、人流最多嘅東京站一番街仲有精品專門店搞期間限定活動，其門如市，男女老幼見到艾露貓爭住攬，喂，我都要同佢合照呀！

攬艾露搶盒帶

芒亨有幾勁？身在日本感受最清晰，親眼所見各大連鎖電器店，截至上星期三，《芒亨 4》仍然處於斷貨狀態，想買要等補貨！但都唔好以為只得宅男識欣賞，好似最近裝修重開嘅東京站地下街「一番街」入面，由 9月 18日至 9月尾就有間期間限定芒亨專門店，吸引唔少女仔同師奶睇到唔願走，反而秋葉原打扮嘅男仔影都冇！上星期日仲有緊急活動艾露貓攝影會，記者收到風亦即時見證到艾露貓人氣一刻，大人細路個個爭住同佢影相，可以話係最 hit日本角色！難怪當中唔少艾露貓周邊已經畀人買晒，由遊戲變成大熱精品，唔簡單呀！

日本處處都係《芒亨 4》，最搶眼係日本國足中場本田圭佑代言嘅廣告，出現响各大 JR站，想見唔到都難。 

各大電器鋪同秋葉原 game鋪清一色都係主打芒亨，但留意下就見到遊戲往往係「品切中」，即係返緊貨，冇得賣！香港雖然係捱水貨貴 game，起碼有得玩！ 


有圖有真相，艾露貓一出，個個圍住影。睇落人多恐怖，其實日本人勁守規矩，冇指示下竟然自己識排隊等影合照，冇爭先恐後打餐飽。 

東京台場都有芒亨

其實《芒亭 4》專賣店只係於東京站地下街 B1F層的「東京角色街」一個寄賣式攤位，呢度仲有其他日本卡通角色精品賣，值得一去。但如果想睇埋其他 CAPCOM遊戲如《街霸》、《戰國 Basara》嘅紀念品，可以去台場嘅專門店。（台場 AQUA City 3F 90號鋪）

(繼續閱讀...)